Accademia ligustica do Brenno di Pasquale Senno San Patrizio, che disgrazia! Se, o cangiâ, diventa vizio se scriviâ: Dassio, Servissio, Strassio, Ossio, Sodalissio! Se sta tromba a piggia fiato, comme primma concluxon, ottegniemo o risultato de creâ da confuxon! Frasi strane se lezziâ: « Posso attinze a-o vostro posso? » « Gosso tutto perchè o gosso contro vento o me fà suâ ». O toscano o scrive « Casa » poi però o se mangia a « C » pronunçiando solo « 'asa » e nisciun trêuva da dî. In Sicilia a « T » a l'é « C », dixan « motta » e scrivan « morta » s'eì coraggio andâeghe a dî ch'a ve pâ 'na cosa storta. Ognidovve, a tradizion se rispetta; e comme mai solo a Zena a « Commiscion » pe 'na « Zetta » a l'é in ti guai? Mi conseggio d'andâ adaxo e çerca de no strafâ e correzze, se l'é o caxo ma, atrimenti, lasciâ stâ!   Dalla Civica Raccolta delle Stampe di Milano Pigiòu da-o Boletìn da Conpàgna N. 3, Màzzo-Zùgno 1974

[ in çimma da pàgina ]

Quàrche nòtta

Da-o tèsto da poexîa s'acapìsce chò-u probêma o l'êa quéllo da "èsse" e da "zìtta". De fæti a Comisción a l'é inti goâi pròpio "pe 'na zétta". Peu dâse che a Comisción a l'àgge propòsto de no deuviâ a létia "z" pò-u són [s], preferìndo a scritûa "ss". Écco perché o Sénno o scrîve prìmma disgrazia e vizio co-a "z" e poi dassio, servissio, ecc. co-e "ss".

Gh'é pöi doî zêughi de paròlle. O prìmmo o l'é: « Posso attinze a-o vostro posso? » che o Sénno o l'öriéiva scrîto coscì: « Posso attinze a-o vostro pozzo? ». Pe quésto vèrso inta grafîa ofiçiâ no gh'é problêma perché o va scrîto coscì: « Pòsso atìnze a-o vòstro pósso? ».

Diferénte a l'é a questión pe l'âtro vèrso: « Gosso tutto perchè o gosso... ». Ànche chi o Sénno o gh'à nostalgîa da scritûa: « Gosso tutto perchè o gozzo... ». Inta grafîa ofiçiâ l'anbigoitæ a l'arèsta perché e dôe paròlle "gosso" se dîxan pæge e quìndi vàn scrîte pæge: « Gósso tùtto perché o gósso... ».