“Ma da dov’a se piggia?” “Dimme ’n pö: l’é pròpio vea ch’a l’incomensa chi a San Pê d’Ænn-a?” “E dov’a finisce?” “Sci, a gh’é! L’an dito a-a televixon”. “Ma ti ti l’æ vista?” “Mi no, no ghe son ancon stæto”. Ghe daggo ’n cianto chi pe no angosciave. Ò solo vosciuo riportâ i descorsci che se sente fâ in gîo, e no solo a San Pê d’Ænn-a. De cöse parlo? E de cöse voei che parle! De l’araba fenice: che vi sia ciascun lo dice, dove sia nessun lo sa. Saiva a dî? Ma za l’ei acapio tutti: a mâvegioza, unica, inimitabile stradda a mâ! Aloa, tanto pe contasela: l’an averta e gh’an za dæto o nomme: via Guido Rossa. Mi proponn-o «Strada Guido Rossa» e spero pròpio che a comiscion toponomastega, ch’a no l’à ancon decizo ninte, a veugge ciamala coscì. Ma pe pigiala bezeugna savei comme se fa. E za! Perché cartelli che ne diggan dov’a l’é pe òua no ghe n’é! Quarche giorno fa ea a Sestri Ponente e ’n amigo o m’à dito: “Ti l’æ ancon fæta a stradda a mâ?” “No – gh’ò rispòsto – però òua me spiego percöse gh’ea ’n trafego do diao a-a rionda pe intrâ in Sestri!” Perché li gh’é a scortia da neuva stradda (armeno coscì me pâ d’avei inteizo). Lê o l’à continoòu: “Quande ti væ a Zena, falla. A se piggia da-a staçion de Cornigen. Tegnite in sciâ drita e ti vediæ che gh’é ’na stradda ch’a chinn-a in stisinin: a l’é quella”. L’ò fæta: a l’ea squæxi veua e son sciortio da-a Scciumæa. Doî gii e tò-u li che son a ca. Però che fadiga!

O Crescentin

Pigiòu da-o Gazzettino Sampierdarenese Anno XLIV - N. 2, 28 de frevâ do 2015