No devo avei capio ben. Eh za! Ciù s’invegia meno s’acapisce. Coscì me l’ò fæto ripete torna. Ma cöse veu dî: depenalizzazione? A l’é ’na paròlla ch’a seunna mâ: stanni a vedde che sotta gh’é ’n inbròggio... No, no: aivo acapio ben: depenalizaçion veu dî che no ti væ in galea sciben che ti t’ê conportòu da delinquente. Sci, ma solo pe-i reati ciù picinetti! Insomma me voei inbarlugâ! Però dæto che a cösa a l’é sucessa inte l’urtimo Conseggio di Ministri, se peu leze inti giornali do primmo de dexenbre quarcösa de ciù. L’é stæto decizo che tutti i reati ponii co-ina penn-a finn-a a çinqu’anni de galea peuan ese archiviæ. Ma quæ son sti reati? Stæ ’n pö a sentî: fâ di furti, fâ di danni, fâ de violense, fâ de minacce. Insomma pe tutti i reati ciù odioxi, che colpiscian de ciù a brava gente in caza e pe-a stradda, e che se leze ciù de spesso che vegnan fæti (e no l’é goæi ch’an aröbòu inta sede do Gazetin), òua no se va ciù in galea. Comme dî che i laddri peuan fâ i laddri e i malemmi fa i malemmi: insomma ’n invito a conportase mâ. ’Na vòtta l’ea reato giastemâ, ese molesti (ò perché inbræghi ò perché se domandava con tròppa inscistenza): òua se peu aröbâ, fâ de minacce, conportase mâ tanto in galea no se ghe va! Gente, dònne! Che vegnî ciù asperti! ’Na vòtta e borsette e tegnivi a stracòlla in sciâ spalla: ve ronsavan e ve-e portavan via. Aloa l’ei misse a stracòlla de traverso (da-a spalla drita a-o scianco mancin): ve taggian a stracòlla co-in cotelin e v’aröban a borsa. Coscì devi inventave quarcös’atro: dinæ inta stacca, into steumago. Ma atenti! Òua ve peuan picâ, ronsâ, aröbâ e in gaea nisciun ghe va! A-a fin va a finî che devi ringraçiâ i delinquenti che ve tegnan de longo in alenamento. E mi ascì devo ringraçiali perché me dan tanti argomenti pe mogognâ.

O Crescentin

Pigiòu da-o Gazzettino Sampierdarenese Anno XLIII - N. 10, 16 de dexénbre do 2014