Dixan che coscì l’é megio, che coscì se risparmia anbiente e dinæ. Mah... saiâ... Mi sò solo che quand’ò pagòu a Tari, ’na specce de neuva verscion da vegia tascia in sciâ rumenta, ò pagòu de ciù che l’anno pasòu. Pe questo (ma no sò ben se pe spende de ciù ò de meno) òua pâ che bezeugne fâ a “raccolta diferenziata” da rumenta. Beh, no l’é che mi segge contraio a arecheugge in mòddo diferençiòu a rumenta. L’é za da ’n pö che mæ mogê a mette inte ’n canto o veddro, inte ’n atro a plastica e inte ’n atro ancon o papê. E mi ògni vòtta che vaddo a caciâ via a rumenta “diferençiâ” me domando de longo: ma no l’é che pöi quande i cammi arivan a Scarpin cacian tutto inte ’n unico bolacco dove tutto se mesccia e adio “raccolta diferenziata”? Mah... sciben che son in mogognon tutte e vòtte me rispondo de sta tranquillo: quelli che ne governan no son miga scemmi! Saiâ... a l’avieiva dito mæ lalla fantinn-a. Ma percöse ve parlo da rumenta? Perché quarche giorno fa an picòu a-a mæ pòrta, chi a San Pê d’Ænn-a, pe consegname o “kit” (kit? E cös’o l’é? Se vedde che no gh’ea ’na paròlla zeneize) pe arecheugge l’umido ascì in mainea diferençiâ. M’an dæto in çestin de plastica de colore maròn e quarantéutto sachetti de papê traforòu, no sò se pe fâ pasâ a spussa ò o liquido ch’o se forma. E comme se fa a ese segui che quande se pòrtan inti cascionetti no se sgoaran? E quande l’ò finii chi l’é che me i pòrta? L’ò amiòu into moro o scignoro ch’o me l’à consegnæ: a gena a se poeiva tocâ! E cös’an inte l’anima sti belli agibbi de l’Amiu: che quand’ò finio i sachetti de papê vadde a acatâ i sachetti biodegradabili, che costan cai? ’N’atra tascia in sciâ rumenta?

O Crescentin

Pigiòu da-o Gazzettino Sampierdarenese Anno XLIII - N. 9, 30 de novénbre do 2014