M’aregòrdo d’avei lezuo che filòsofo e matematico do Galles Bertrand Russel (1872-1970) o diva che, inti tenpi pasæ, i comercianti e i laddri de mâ ean ciù ò meno a mæxima cösa. L’é anche vea che, quande se trasportava a röba pe mâ, e nave doveivan ese munie de canoin pròpio pe difendise da-i laddri de mâ: insomma e cöse no ean goæi diferenti da quelle d’ancheu. Ma quarcösa l’é cangiòu. Prezenpio i comercianti no son ciù di laddri (sciben che quarchedun o fa de tutto pe esilo...) e chi aröba o no rischia quæxi ninte, mentre ’na vòtta o poeiva lasciaghe a pelassa. E za: ’na vòtta ògnidun se difendeiva da pe de lê e chi picava ciù södo o goâgnava. Ancheu goai a provase de fâ do mâ a ’n laddro: ti ti væ drito in galea e lê o te mette a-i löi giando libero pe-a çitæ! Coscì, con tutta a bora che gh’é e con tutte e dificoltæ che gh’à chi vegne chi da foresto ò, pezo, da clandestin, fâ o laddro o l’é ’n mestê ch’o rende dæto che, se t’agoantan, o “disagio sociale” tò-u riconoscian de seguo e in galea no ti ghe væ, e se ti ghe væ ti ghe stæ pöco. Saiâ pe questo che a gente a no se sente segua manco ’n caza: òrmai gh’emmo de pòrte che non gh’an ninte da invidiâ a quelle de cascefòrti: atro che “a-i mæ tenpi quandi-â pòrta a s’arviva co-o spaghetto”! Feua de caza, pöi, bezeugna avardase ben a chi t’æ da-a vixin. E se pöi o pòsto o l’é izolòu, comme i box de Don Bosco, li no gh’é de problemi: ti peu scinn-a demolili che no se n’acòrze nisciun. Ma no stæ a preocupave e dormî seunni tranquilli: tanto mi son solo ’n mogognon...

O Crescentin

Pigiòu da-o Gazzettino Sampierdarenese Anno XLIII - N. 6, Zùgno Lùggio do 2014