Digg’a veitæ, stentavo a creddighe quand’a-a radio ò sentio a clasifica di scudetti de squaddre de balon: Juventus 29, Inter e Milan 18 e poi... o Zena a 9! Saiva a dî che in ciù de çent’anni solo træ squaddre son ariêscie a goâgnâ ciù scudetti do Zena. Sci, l’é vea, n’an goagno tanti de ciù, ma nisciun’atra squaddra, levòu quelle træ li, a ghe l’à fæta a sobacalo. Sotta, con 7 scudetti, ghe n’é træ: o Pro Vercelli (ciutòsto feua zeugo perché o l’é in C), o Bològna e o Torin. Do 1991 o Döia o gh’à avuo a capaçitæ de goâgnane un, merito do seu grande prescidente, o Mantovani, a-o quæ gh’é stæto intitolòu ’na stradda a-a Scciumæa. Però, sciben che no segge goæi apascionòu do zeugo do balon, me pâ strano che tutti i scudetti dò-o 2002 scinn-a a ancheu se seggian concentræ in træ sole squaddre: l’Inter a l’à goagno pe 5 çinque de filla, pöi o Milan doe vòtte e pöi quattro vòtte a Juve, ch’a l’é in scî pissi de goâgnâ anche st’anno chi (e quindi pe-a terza vòtta de filla). Me saieiva cao acapighe quarcösa de ciù: savei se goâgnâ o l’é solo ’na question de palanche ò se quelle træ squaddre son in còcca no sò con chi. In ògni mòddo, povie mæ squaddre da mæ çitæ (o Zena e o Döia, ma mi ghe metto o Spezza ascì), chisà quante ghe saiâ ancon da aspêtâ pe poei vedde in atro scudetto! Inte l’ateiza çerchemmo armeno de sta tutti in A, magara inta parte drita da clasifica...

O Crescentin

Pigiòu da-o Gazzettino Sampierdarenese Anno XLIII - N. 4, 30 d'arvî do 2014