Il pezzo che ospitiamo questo mese è opera di un altro giovane genovesista di talento: Fabio Canessa. Fabio ha vent'anni e vive a Genova, dove studia presso il Dipartimento di Scienze Politiche. Membro dell’associazione A Compagna, è curatore, insieme all'amico Stefano Lusito, dell’innovativo corso di lingua genovese (gratuito e offerto alla cittadinanza) organizzato nell’ambito del Sodalizio e che si terrà presso lo StarHotel President (zona Brignole) ogni giovedì, dalle h. 21.00 alle h. 23.00, a partire dal 13 marzo p.v.
F.B.

Niatri zeneixi semmo fæti coscì: de longo convinti d’ese segnæ da-o destin, superbi e vitimisti insemme, gh’emmo l’òsescion da desgraçia ch’a ne pende in sciâ testa.

Tanto che i vegi da mæ famiggia contavan ’na stöia: in giorno, da ’n çimma di monti de Quessi, quarchedun diâ co-in sospîo: “lazù, ’na vòtta, gh’ea Zena!”. Dapeu, a stæ pasâ, in sce ’n libretto pin de coixitæ in sce Zena, lezo ch’a no l’é solo ’na föa in veuga da-e mæ parte. Parlemmo de ’na vea profeçîa, sciortîa da-a bocca de Santa Brigida in giorno do 1346 ch’a s’ea fermâ a Zena. Montâ con seu figgia sciù da-o Righi, longo e Miage de Ciappe, a l’à sentençiou che “in giorno, l’òmmo ch’o pasiâ de d’ato a-i monti che stan in gio a-a çitæ, pontando co-o dio i muggi de zetto da lonxi, o diâ: lazù gh’ea Zena”.

Ma quæ poriâ mâi ese ’na catastrofe tanto gròssa da levane tutti d’insemme? Se demmo a mente a-o mâ ò a-o çê, semmo za in fallo. A desgraçia ghe l'emmo sotta i pê. Gh’emmo arenbou adòsso, tòcco pe tòcco, e nòstre prie, miage, cæ e grataçê. Emmo preteizo de contegnila inte nòstre gagge de færo e de ciumento. A tæra. A tæra ch’a ne scuggia da sotta e scarpe portandose apreuvo o peizo da nòstra çiviltæ avansâ e abrascâ. L’asesô a-i loei pubrichi do Comun, Gianni Crivello, o l’é stæto in biblico comme Santa Brigida: “A l’é ’na scitoaçion da tersa goæra mondiâ”. E comme daghe tòrto: ògni stissa d’ægoa cheita da-o çê a pâ mandâ apòsta pe caciâ tutto a l’âia. Saiâ vea ascì che ’na vòtta no ciuveiva coscì de spesso e coscì tanto, e che o teren da Liguria, za mâciapou pe conto seu, o no têgne ciù. Sæ comme sæ, sciusciant’anni fa meitæ da Zena d’ancheu a no l’existeiva.

A fea de frann-e – l’urtima ediçion – a l’ea comensâ l'anno pasou. Giusto a l’iniçio. A-i 2 de zenâ, in via Brigata Salerno, a Sturla, in miâgion o s’inversa in sce çinque machine postezæ: nisciun ferîo. A pöchi metri gh’é a cazerma di Carabinê. Pròpio trei meixi dòppo, l’àngiou do lunesdì de Pasqua o pòrta ’n bello regallo a-o Lagasso: in via Ventotene derua ’n’atra miagia sotta a stradda. Anche stavòtta gh’intra ’na cazerma (desmissa), a “Gavoglio” e doî cazermoin de d’ato, pin de gente. Pe-a crònaca, o ciantê o l’é ancon lie. Un di caxi ciù scignificativi o l’é quello de via Sant’Oberto, a Sestri Ponente. No se n’é parlou goæi, e za o fæto o doviæ fâ pensâ. A-i 4 de novenbre cazze anche chi ’na miagia, portandose derê ’na ringhêa, di pontezzi, in motorin e quarche machina da scavâ. E sci, perché a caxonâ o scròllo l’é stæto i travaggi in corso pe-a construçion de ’n bello parchezzo. Con tutti i seu permissi, ciæo. I abitanti aivan dito ciù vòtte che no-o voeivan, e àn contou a-a stanpa che ’na frann-a se l’aspêtavan. In veitæ, quelli do “mi l’aiva dito” pàn vegnî feua de longo in òcaxoin pæge.

Inti urtimi tenpi o “caxo Liguria” o s’é mostrou inte tutta a seu gravitæ. Solo che into comun de Zena gh’é stæto ’na caretâ d’epizòddi che l’é za difiçile contâ. Partimmo con quello de San Çeprian, sorvia a ferovîa, con çinquanta personn-e caciæ feua d’in ca. L’ea o giorno de San Steva. L’anno neuvo o l’incomensa ben: a-i 20 de zenâ ’na liggia a Coulongo a lascia a vezo ’na magnâ de cazette pösæ in scî scheuggi. Mæximi provedimenti: tutti alontanæ e pòrte seræ co-e cadenn-e. A-i 8 de frevâ tocca ’n gran resato a quelli de San Tiodöo. Ancon pe corpa de l’ægoa ch’a vêgne de longo, sotta via Dixon se destacca de gròsse prie che cazzan inte ’n parchezzo. O creppo o l’adescia tutti: ’na pansâ de poîa, ma nisciun s’é fæto mâ. Ben ben de gente àn senpre in cheu i 21 de marso do 1968, quande inta mæxima stradda l’ea mòrto 19 personn-e pe ’na frann-a. L’urtimo atto (pe-o momento) o l’é anæto in scena a Rieu, in via Vezzani, donde o sciô Crivello o l’à fæto a seu meza profeçîa confrontando, giustamente, i goasti caxonæ da-e frann-e co-i bombardamenti da goæra.

E instituçioin, da-o seu canto, ciù che paragoin no san cöse fâ. Mette in seguessa o teritöio a l’é ’na desfîa de ciù due: no se peu savei donde tapolâ, che into pensâ gh’é o reizego de finî de botto inte ’n deruo. E ruspe, pe contra, no s’aferman, perché e gente – pe quante ne dixan – veuan aveighe ’n beuggio da infiaghe e seu quattro reue, quande no son eutto ò ancon de ciù. Ma s’a ghe veu za tutta che stemmo in pê, saiâ pròpio o caxo de pertuzâ atri monti pe faghe pasâ de neuve stradde?

Fabio Canessa

Pigiòu da-o Gazzettino Sampierdarenese Anno XLIII - N. 2, 28 de frevâ do 2014