A mi m’é cao giâ pe-e stradde anche quande ceuve. Gh’ei mai fæto caxo? A çitæ a luxe d’ægoa e o luvego do çê o mette coæ d’ese a-o sosto, sotta ’n teito, magara in caza. Quande pöi o sô o tramonta aloa s’açende mille luxe: i lanpioin de stradde, ma anche e vedrinn-e de biteghe, scinn-a che vegne l’oa de serâ e e vedrinn-e s’asmòrtan pe-a neutte, regno di seunni e di deslögioin. Ma quarcösa, diggo a veitæ, pâ cangiòu. Eh za: a crixi! Tante biteghe særan e tante an za seròu. Dove primma gh’ea luxe de festa, segno de ’n’ativitæ ch’a dava goagno a ’na famiggia, òua gh’é ’na sæxinn-a tiâ zu, ’na cioenda çitadinn-a de færo ondulòu che no solo a no fa luxe, ma a fa scuo e tristessa. Però (da bon mogognon sensa però no pòsso stâ), però pâ che sære solo e biteghe di zeneixi ò di italien, saiva a dî e nòstre biteghe da tradiçion, dove t’atrovavi röba zeneize e dove, ciù spesso de quante se porieiva pensâ, se parlava zeneize ascì. Quande i nòstri særan tò-u li che gh’é di cineixi che n’aprofittan pe arvî i seu bazar (che no son “Il bazar del mugugno” do sciô Ratella) pin de röba che te lascio dî. Ma arvan anche di saloin da peruchê: e vanni a savei quæ scianpi, quæ loçioin, quæ igene gh’é la drento! Ciù de recente veddo che vegnan averte de biteghe da bezagnin: son arabi, möi, marochin che vendan röba seu, ma anche tantiscima röba nòstra. Pâ che e antighe bezagninn-e do Bezagno segian anæte tutte in penscion e che nisciun de niatri o gh’agge coæ de vende verdua e fruta, çiòule e patatte. Manco i banchetti di mercoei rionali son stæti risparmiæ. Facce foreste, che do Medioevo aviescimo dito da saracin, con doe coverte pe-a tæra vendan de tutto, ma pâ che segge tutto regolare... E coscì mi, se m’atreuvo in Stradda Datilo e me ven coæ de parlâ zeneize, vaddo da ’n marochin ch’o parla o zeneize megio de tanti zoeni. Ma l’é poscibile, diggo mi, che dove i zeneixi no riescian a tiâ avanti i foresti, quelli de la da-o mâ, riescian a vive e a fâ di afari?

O Crescentin

Pigiòu da-o Gazzettino Sampierdarenese Anno XLIII - N. 2, 28 de frevâ do 2014