Dîme ’n pö: ma viatri quande ’ncomensæ ’n lou arivæ finn-a a-a fin ò ghe dæ in cianto li, quande sei a meitæ co-a speransa ch’o se finisce da solo? Sci l’ò acapio e o sò mi ascì che “a fuga di zeneixi a dûa trei giorni”, che dòpp’in pö no ghe n’emmo ciù coæ e voemo fâ quarcös’atro. Ma questo da privæ! No l’é poscibile che o Comun ò chi diàscoa ve pâ de coscì dite “aministraçioin publiche” comensan in lou, inandian o ciantê, fan dötrei tapolli, inciastran quarche miagia e pöi tò-u li che a ditta a falisce e i travaggi za fæti e quelli ancon da fâ vegnan abandonæ a-o seu destin. Quarche transenna, in pö de tubbi “Innocenti”, quarcösa per levâ quell’inbarasso da-a vista di pasanti e “chiuso!”: i travaggi arestan li fermi pe l’eternitæ! Ma ve pâ giusto? L’atro giorno ea a tòrsio in stradda Cantore, a perde in pö de tenpo a amiâ sta bella stradda, önô de San Pê d’Ænn-a e oua reduta comme ’n strason da lavâ ’n tæra, e me cazze i euggi in sciâ palasinn-a dove gh’ea a nostra biblioteca Galin e, pe urtimo, anche o nostro Gazetin. Mò-u belin! (lasciæmelo dî perché no me vegne atro). Ma da quanti anni gh’é i loei in pê? O Gazetin l’àn caciòu feua co-a promissa ch’o saiæ ritornòu a-a spedîa, ma tutto l’é fermo: no se mescia manco ’na feuggia! E visto che l’é da ciù de ’n anno che nisciun ghe fa ciù ninte, quarche legera o preuva a aröbâ perché, a-a fin, intrâghe drento o no l’é poi coscì difiçile. Aloa se intervegne pe ripristinâ i scistemi d’alarme, se særa i sgoari fæti pe intrâ e, pe ben ch’a vadde, tutto o vegne rimisso comm’o l’ea primma. E de continoâ i loei, manco l’onbra. Ma l’é mai poscibile che e nostre istituçioin stagan a amiâ sensa poei intervegnî pe restitoî quella palasinn-a a niatri çitadin?

Ò finîo, ma gh’ò ’n beziggio inta testa da quande ò parlou di tubbi “Innocenti”. Ma quante costan? Mò-u domando perché da tutte e parte ghe n’é di abandonæ, lasciæ li a fâ a ruzze. Ma costan coscì pöco da poeili stragiâ inte sto moddo chi? E no dîme che son in mognon...

O Crescentin

Pigiòu da-o Gazzettino Sampierdarenese Anno XLII - N. 3, 27 de màrso do 2013