L’atro giorno, che no saivo cöse fâ, tanto pe stragiâ o tenpo ch’o m’avansa, son anæto in giandon pe San Pê d’Ænn-a. Bella cosa, diei viatri, San Pê d’Ænn-a a l’ea çitæ ricca e, quand’a l’ea comun outònomo, a l’aiva ’n bilancio megio che quello de Zena. E poi ville, palassi, quaddri, e i porteghi de stradda Cantore... insomma, sciben che sotta Zena emmo perso bene ben da nostra identitæ, a giâ pe-e stradde se vedde ancon a gloria do pasou, no poi coscì lontan. Fæto sta che, tra palassi, gexe, caroggi, stradde e stradoin, l’euggio o m’é cheito in scê outomobili ascì. Belle, moderne, co-in muggio d’angæxi (se che dîxe acesori) da perdighe a testa apreuo. Però... però quella machina lazu a no l’é propio ben tegnûa. E quella moto: comm’a fa a anâ in gîo co-o selin tutto pertuzòu che ghe sciorte a gomma ciumma che gh’é drento? Coscì, l’ò amiæ in pö ciù da-a vixin. Ma l’é ’nposcibile! Ma son tutte machine e moto abandonæ ò zu de li! Dove gh’é ’n parcheggio de moto, dotræ son rotte e lasciæ li a meuiâ. E machine, de spesso parchegiæ ben, co-e gomme sgonfie e, ma no senpre, quarche veddro rotto. E tutte co-a targa! Ma, diggo mi, perché i cantonê no se dan da fâ a pigiâne notta pe vedde chi l’é o padron? E perché no vegnan portæ via, dæto che son li da chisà quante? Miæ, balæ, che o færo o no ne mette de reixe! E za, me ven da dî, ma cose mogogno a fâ: saieiva troppo bello vedde e stradde de San Pê d’Ænn-a senza tutti sti remazuggi de machine vege! Cose da estraterestri!

O Crescentin

Pigiòu da-o Gazzettino Sampierdarenese Anno XLII - N. 2, 20 de frevâ do 2013