Ma gh’ei fæto caxo che e stradde de Zena, e quelle de San Pê d’Ænn-a in particolare, son tutte bricchi e fòsci? No gh’é ciù ’n posto dove no ghe segge di pertuxi grendi comme caze! Oramai anâ in gîo pe-a çitæ l’é pezo ch’anâ inte ’n percorso de goæra fæto aposta p’adestrâ i sordatti. Ah no, no, no. No ghe semmo pròpio pe ninte.Ti caminn-i in sciô marciapê e, se pe caxo ti te gîi a amiâ percöse quelli doî ratèlan (quarche ciæto bezeugna pure fâlo!), ti væ a réizego de ’nfiâ ’n pê inte ’n pertuzo, de perde l’equilibrio e de pigiâ ’na bella strasonâ ’n tæra. Ma com’a l’é ch’a l’é che sti açindenti de pertuxi nascian comme i fonzi quande l’é ciuvûo? M’àn vosciuo dî che tanti pertuxi son fæti da-i ratti che vivan sototæra... Mah... Chisà pöi se l’é vea...

O fæto o l’é che, inte tutto sto bordello de pertuxi, o Comun o “latita”. Eh sci, perché quande se ciamma i cantonê pe segnalâ ’n pertuzo neuvo se pe caxo riescian a vegnî (oramai i cantonê fan de tutto meno che i serviççi che serve a-a gente) ciaman l’oficinn-a comunale ch’a mette a solita transenn-a, o solito sachetto de pin de tæra, e a lascia che st’anbaradan o l’invege da divegnî in reperto storico. Manaman s’a l’atapesse i pertuxi quarchedun porieiva anche evitâ de cazze. Armeno, diggo mi che son vegio e de sæximo in caza mæ ghe n’é asæ, che s’atapesse i pertuxi da-a vixin a-e scheue dove ghe va i figeu picin. Pesta o diao: manco quelli.

Ma doveiva imaginamelo che e cöse no peuan anâ che coscì! Defæti, cöse ti te peu aspêtâ da ’n pòpolo, i zeneixi, ch’o ciamma i “buchi” in trei moddi diversci: pertuxi, beuggi e garbi?

O Crescentin

Pigiòu da-o Gazzettino Sampierdarenese Anno XLI - N. 9, 31 d'òtôbre do 2012