Corî in sciâ sorviaelevâ a sciuscianta a l’ôa a l’é ’na cösa ch’a da ’n’emoscion comme a Leman! Va ben, saieiva Le Mans, ma niatri zeneixi a esse finale no-a dimmo... Pe questo niatri de San Pê d’Ænn-a, che a femmo avanti e ’nderê in muggio de vòtte, semmo di privilegiæ. E za, perché anâ a quella velocitæ da brivido e da poîa o n’inbræga comme s’æscimo bevûo in botigion de vin de quello bon. E pöi chi ne peu ripagâ da giöia che se preuva quande, dòppo quarche chilometro, t’ariesci finalmente a sorpasâ l’atra machina in sciô fî di sciuscianta a l’ôa? Ma niatri, chi a Zena, no voemo fase mancâ mai ninte! Quande, do mille neuveçento sciusciant’e çinque, a l’é stæta inougurâ gh’ea doî limiti de velocitæ: no se poeiva anâ ciù fòrte di sciuscianta e ciù cianin di quaranta. Ancheu, co-o tiotor (tutor scrito inte ’n ingleize azeneizòu), l’é stæto levòu o limite di quaranta ma àn lasciòu quello di sciuscianta. Ma comme! Quande l’àn fæta e machine a-i sciuscianta frenavan inte çinqueçento metri e òua, che s’aferman in dexe metri, no se scangia a velocitæ mascima? Mah! Maniman ne favan unn-a giusta! A veitæ a l’é che nisciun sa cöse s’aleuga inta testa de chi n’aministra! De seguo anâ ancheu in sciâ sorviaelevâ l’é comme ese a ’na procescion pe ’n funerale! In ritorno a l’antigo, dæto che de procescioin no se ne fa ciù. Saiâ... però...

O Crescentin

Pigiòu da-o Gazzettino Sampierdarenese Anno XLI - N. 4, 30 d'arvî do 2012