Comme? Quanti son? Dexe? Chinze? Comme saiva a dî: no se sa? Ah za, perché quarchedun o porieiva ancon azonzise perché gh’é tenpo scinn-a a-i primmi d’arvî? Ma chi emmo perso anche quello pöco de sæximo ch’o n’ea arestòu! Ma l’é mai poscibile che pe eleze o scindico ch’o l’aministriâ Zena pe-i proscimi çinque anni devan corî in coscì tanti che no s’ariesce manco a savei quanti son? Za che mò-u diva o Poin: “Verdi da solo o l’à scrito in muggio de opere; òua pe scrive ’na cansonetta se ghe métan in quattro”. E chi pægio: tutti che veuan fâ o scindico... Ma percöse pöi... E tutti a dî e mæxime cöse: o mæ progetto pe Zena o l’é megio do teu; quelli ch’àn aministrou scinn-a chi àn fæto solo di danni; òh no: l’é tròppo inportante no cangiâ pe poei portâ a termine travaggi e idee ch’én a vitta da çitæ; no se peu ciù anâ avanti coscì: ghe veu da gente neuva... Za che mi no me fîo goæi de quelli che van a çercâse o mâ comme i meghi. O goagno o no l’é pöi coscì tanto e i fastiddi son pezo che ’n sciammo de sinsâe. E pöi, dìmosou, sensa dinæ (e dinæ a-a giornâ d’ancheu ghe n’é pesso!) no se peu fâ pròpio in bello ninte! E aloa percöse tutti sti chi s’ascadan pe fâse eleze scindico? Eh, sci! Pövia mæ Zena! Gh’é solo da sperâ che chi saiâ a Tursci a dovei decidde di nostri destin, veugge tanto ben a Zena. Mah, intanto mi no sò miga cöse fâ, maniman, no se sa mai, se no çerno a personn-a giusta...

O Crescentin

Pigiòu da-o Gazzettino Sampierdarenese Anno XLI - N. 3, 31 de màrso do 2012