Lêu-êu-êu-êu-êu-êu-êuh!
O fiâcre nùmero trézze!
Tànti se crediàn ch'o ségge o romànzo... maché, a l'é a mæ caròssa... e mi pâo "Il vetturale del Moncenisio"...
Quésti che són cavàlli!
Fèrmite Baciâra!
O l'à goâgno tànte córse a-i Pariöli che bezéun'avéilo vìsto: sôlo che a-a parténsa, cón quàttro mòtti de sùcou o me pigiâva i çénto mêtri; a-a meitæ córsa, cón træ ciapelétte, tórna çinquànta mêtri; prìmma d'arivâ o bescutìn e, a l'ùrtimo, o pigiâva-e caróbbe...
In pö de cavàllo sci...
Inta côa o pà'n ràtto, inte oêge 'n âze, o còrpo o l'é 'n osàrio...
Epûre o l'é 'n cavàllo móscio èh...
Menestrón o no ne màngia, a l'insalàtto-u ghe fa-e fàcce, e meizànn-e pìnn-o-u no-ê veu, o rîzo-o no ghe va zu, e reginétte ghe vêgnan sciù, o fén o ghe fa vegni-ô nervôzo, e caróbbo-u crescentìn... Chi anémm'avant'a són de bacæ e calmîne...
Da dòppo chò-u conóscio, mi no l'ò mâi vìsto rîe 'na vòtta.
Mi no-o sò cös'o l'àgge 'nta tésta. Pe adormîlo gh'eu a camamìlla, pe adesciâl-â trónba; a-a néutto-u rónfa, a-a matìn o râgna. E scàrpe o l'eu co-o tachétto. Se tî-ê goìdde, o s'asétta, se-e mòllo, o va 'n tæra... Mànco s'o fîse vêgio, dìggo, o l'à trént'ànni!... L'ùnica cösa ch'o l'à de bèllo l'é ch'o no s'înónbra: o no védde distànte 'n pàrmo... Mah... pòsso provâ-a dâgh'ancón dötræ bacæ, mò-ò poîa che no se ne faiâ ciù nìnte, mànch'in cavalétto da marmâ...
Voéi rîe? Da dòppo che l'é finîa-a goæra, 'na vòtt'a l'ànno o veue férie, a Natâle biâva dópia e, lòccia che te lòccia, me tochiâ dâgh'ànche i-aségni familiâri.
L'âtro giórno êa li a-a staçión, me càpita 'na scignôa de quélle 'n pö "svilupæ" (me pài a l'êa çénto sciusciànta chìlli). A me dîxe: "Piazza Manin. Gh'ò dîto: "Scignôa, scià l'àgge paçiénsa, cómme fàss'a portâla sciù pe Via-Azaròtti co-in cavàll'a quélla mainêa li? L'é 'nposcìbile! Pe-a montâ o sciùscia, in deschinâ o l'à-e vertìgini, in cianûo-u patìsce d'àsma, òu sô-o s'adòrme e a l'ónbro-u pîza. O l'é 'n cavàllo che sótt'a-a pànsa ghe voriæ'n carèllo coê bìlie..."
E pensâ che vìnt'ànni fò-u mangiâva de tùtto: færi da stiâ, târi de consèrva, gàgge de çetroìn, strónsci d'ardiciòcca, scàtoe da lùstro, scòrse de patêca, savonétte, naftalìnn-a, sétti da carêga... E o digerîva tùtto sénsa bicarbonâto. O mangiâ o gh'anâva scìnn-a 'nte ónge. Öa 'nvêce, tùtte-e vòtte chò-u pòrt'a béive, o me refûa l'ægoa: o l'eu de gazeu!
Uuuuuuh, vànni!