L’artìcolo determinatîvo la o l’é ùnico pe scingolâre e plurâle, maschîle e feminîle e o no s’adêuvia davànti a-a paròlla Esperanto, a-i nómmi de persónn-a ascì precedûi da tìtoli cómme Doktoro, Profesoro, Sinjoro, a-i nómmi giögràfici, a quélli di méixi, a-i agetîvi posescîvi. O se peu adêuviâ se quésti nómmi són precedûi da âtre paròlle e davànti a-i pronómmi posescîvi: La fama Doktoro Zamenhof elpensis la lingvon Esperanton (O famôzo Dotô Zamenhof o l’à concepîo a léngoa Esperànto); La urbo Londono (A çitæ de Lóndra); La franca Majo (O Màzzo françéize); Ĉi tiu estas mia loko, la via estas tiu (Quésto o l’é o mæ pòsto, o teu o l’é quéllo).

In Esperànto no exìste i artìcoli indeterminatîvi un e unn-a e i partitîvi, coscì ’na frâze cómme Mi trinkos kafon (e chi acenémmo a-a régola de l’acuzatîvo faxéndo notâ a finâle -n ch’a l’ìndica o conpleménto dirètto, kafon, do vèrbo tranxitîvo trinki) a peu voéi dî “Mi beviö cafè”, coscì cómme “Mi beviö do café” ò “Mi beviö un café”.

L’indeterminaçión de l’ògétto do descórso a se peu rénde co-i corelatîvi indeterminæ (parliêmo ciù avànti de série de paròlle corelatîve): Estas iu Sinjoro Paŭlo (Gh’é ’n çèrto sciô Pòulo); Mi ekkonis iun ulon (Mi ò conosciûo un tìçio).

No se dêve confónde l’artìcolo indeterminatîvo co-o numerâle unu: in Zenéize ò in italiàn són pægi, ma in Esperànto no. Quànde se veu esprìmme ’na quantitæ unitâia s’adêuvia o numerâle: Mi manĝos nur unu tortotranĉaĵo (Mi mangiö sôlo unn-a fétta de tórta); Mi renkontis du el miaj samklasanoj kun unu el niaj instruistinoj (Mi ò incontròu doî di mæ conpàgni de clàsse con unn-a de nòstre insegnànti).

Inte l’ùrtima frâze a prepoxición el a gh’à fonçión de specificaçión partitîva, ma a s’adêuvia ascì pe indicâ proveniénsa da ’n pòsto seròu ò circoscrîto: Veni el Ameriko (Vegnî da-a Mérica); ò conpoxiçión materiâle: Ringo el oro (Anéllo d’öo); Literatura verko el tri volumoj (Òpea leterâia in tréi volùmmi).

Bruno Valle
Gruppo Esperanto Tigullio

Pigiòu da-o Gazzettino Sampierdarenese Anno XLIII - N. 6, Zùgno Lùggio do 2014