U puæ ou cantiere da cappu o louâva
cyxendu brâghe anche a muæ a guaagnâva
u primmu figgiu ch'u styddia da mêgu
mentre u segundu pe mâ u fa u cœgu.

Cumm'a l'é bèlla a famiggia d'i Lippe
gh'é anche u nonnu ch'u traffega in cicche
l'ynnica sûla ch'a nun s'agiystâva
a l'êa a Carlotta che à u spêgiu a s'amiâva.

Scciœppa 'na crisi e u cantiere han seròu
gh'é 'n puæ de famiggia ch'u l'é sensa lòu
zgubba ciy tantu a mamà Giuzepinn-a
brâghe e giachê, a fa tyttu in cuxinn-a.

Cumm'a l'é bèlla a famiggia d'i Lippe
u nonnu u cuntinnua u cumerciu d'e cicche
l'ynnica sûla ch'a nu s'agiystâva
a l'êa a Carlotta che à u spêgiu a s'amiâva.

Ai œggi d'a muæ vêgne 'na cataratta,
òua ch'a l'é neigra... s'é tytti 'nt'a bratta.
Sensa lasciâ i so styddii da mêgu
u figgiu ciy grande u se trœva 'n inpiêgu.

Cumm'a l'é bèlla a famiggia d'i Lippe
gh'é 'n incrementu int'a çerca d'e cicche
sûlu Carlotta à vœu senpre a gîa
a se pêtena e à u spêgiu a s'amîa.

Stramŷan a flotta da Zêna à Trieste
cuscí anche u cœgu.. eh... u s'atrœva int'e fèste
lazý gh'é 'na figgia che ciy a nu-u làscia
a s'é fæta inguaiâ, sta brytta ba...lurda.

Cumm'a l'é dŷa a vitta d'i Lippe
ancun d'asæ che gh'é u nonnu cuê cicche
òua a Carlotta pariæ ch'a s'adésce
davanti e derê tyttu ghe crésce.

À u figgiu ciy grande, styddia e travaggia,
ghe ven 'na tussa ch'a l'é 'n'avizaggia
pallida a frunte in pulmun in magàgna
ciamman u mêgu, to-u manda in muntàgna...

Cuscí va e côse in câza d'i Lippe
invéntan u filtru.. nu gh'é ciy de cicche,
rèsta u surîzu d'a bèlla Carlotta
òua u cunsôla chi sôfre e chi lotta:

a va à travagiâ int'ina câza de modda
pelicce e vestî... a gh'ha tyttu de badda
in pô ben missa, sens'êse bigotta
a porta à ca' trentamilla pe votta.

Turna à fiurî a salŷte dai Lippe
se mangia raiœ, nun ciy broddu de trippe
se mangia bistecca cun varrie insalatte
nun ciy côi neigri cun quattru patatte

Sûlu u nonettu u pâ triste e avilîu
perché faxendu u sœ sollitu gîu
u l'ha ben vistu che a nessa Carlotta
a fa a "mudella" pe quelli d'a flotta,

u l'ha ben vistu che a nessa Carlotta
a fa ciy franchi se 'n portu gh'é a flotta.