o sæ
a vêa stôia d'u rinpattriu d'u Felîçe Manin
d'u Fabrissiu Cunsegê
Avòu
à San Michê de Pagann-a int'u 1891 u lœidu Felîçe Manin u l'êa stætu restouròu
int'u 1981 dai vêgi meistri d'àscia à Rîva (òua Rîva Trigûzu). Inte quellu mumentu
u lœidu u l'êa fòscia u ciy antîgu barcu liggyre in navegasiun e, a parte e due tŷghe nœve,
u se prezentâva pægiu pægiu ou dizégnu ôriginâ.
U sœ nœvu armatû, Luîgi Capelin, 'n inprezâiu de Milan, u s'êa missu int'a testa de fâ 'na cruxêa atlantica. Se m'aregordu ben, u lœidu u l'êa sarpòu da Zêna aa fin d'a stæ d'u 1984 e u l'êa arivòu à San Salvador doppu duî meixi de navegasiun.
Cu-inn-a ciyzma de œttu mainæ (nœve cun lê), u capitànniu Capelin u puéiva cuntâ insce trei tyrni de guardia dyrante a lunga traversadda. Ou largu d'e Canarrie u l'avéiva duvŷu sustegnî 'na botta de meistrâ. Aa fin, inscee coste africann-e u l'avéiva incuntròu i-âlizêi e a navegasiun a s'êa fæta ciy spedîa.
Int'u 1985 a cruxêa d'a "quarta caravella" a cuntinuâva scin à Miami e Nœva Iorche pe dôtréi meixi. L'intensiun d'u "segundu Culunbu" a l'êa quella de navegâ scin ou sciymme San Luensu, intrâ int'i Grendi Lâghi, restâ à Chicago u tenpu necesâiu à fâse dâ e palanche pou sœ prugettu de arivâ æ îzue Galàpagos, pasandu pou sciymme Mississippi e zy pou Gurfu e u canâ de Pànnama.
Doppu u primmu invernu, de quelli giasæ de Chicago, l'armatû inpruvizòu u l'avéiva capîu ch'a arecygéita d'e palanche a l'êa vegnŷa 'n afâre ciy difiççile d'u previstu.
Int'i sœ gîi pei porti d'u Lâgu Michigan u lœidu u l'êa stætu de lungu aprêxòu da tytti, ma nisciyn pàiva dispunibbile à tiâ fœa e palanche. Missu æ streite l'armatû u nu l'àiva atruvòu ninte de mêgiu che adatâ u lœidu à risturante e adatâse lê à fâ u cœgu à l'ormezzu, cuê cazann-e che vegnîvan à çenâ à bordu; inte'n segundu mumentu - ne cúntan - u Capelin u l'êa anætu à cuxinâ int'i risturanti italien d'a çitæ. Ma questa a nu puéiva êse a sulysiun e, doppu 'n âtru annu de giamin, u Capelin, truvànduse mâi tantu mâpigiòu, u mœiâva a decixun de turnâ à ca' e de recunúsce a batosta.
Sciben che tardi, u l'àiva acapîu che pyrtroppu i-Ittalu·americhen nu mustrâvan u minnimu interèsse à parteçipâ ou sœ sœnnu de fâ navegâ a "quarta caravella" scin ou Pacifficu. U s'êa tardòu à acórzise che quella gente a nu l'êa ciy italiann-a pe ninte e che u sœ ynnicu prugettu u l'êa, fòscia, de cunstrŷe u "National Italian American Hall Sports of Fame", o sæ, yn scínbulu pe glurificâ a sœ cunplêta ascimilasiun int'a sucêtâ
Cuscì u Capelin u l'àiva incaregòu in zuênu d'a mænn-a perché u desse 'n œgiaa ou lœidu, u levesse l'ægua daa sentinn-a cuâ punpa elettrica e u cuntrulesse ben ben i ormezzi.
Duvéiva pasâ
dôtréi inverni, scin ou 1994, quande u zuênu ch'u s'êa 'ncaregòu d'a guardia ou scaffu u
l'àiva pigiòu 'na decixun fòscia necesâia, ma che, aa fin d'i cunti, a saiéiva stæta a ciy
gramma pou fasciamme: u lœidu u vegnîva tiòu à seccu inte'n scâ in rîva ou lâgu. Duî anni
doppu, u nœvu bacan d'u scâ u menaçâva de demulîlu. Inte quellu mumentu li se furma aa
Spezza u Cumitâtu "Sarvemmu u lœidu". Arîva aa fin e palanche giyste pe
stramiâ u scaffu vîa tæra scin ou scâ de Blue Island (Calumet Park), dunde passa
quæxi âtri duî anni sensa che sucêde ninte.
Int'u meize d'agustu d'u 1999 arîva à Chicago u nœvu cúnsule generâle d'Itallia,
Rîcu Granæa. U nu fa mancu 'n tenpu à 'setâse 'nt'u sœ nœvu scàgnu che 'n tanti-û
ciàmman daa Spezza, faxendu apellu æ sœ relasyin de famiggia cuâ çitæ e æ so réixe
"identitâie". A Nasiun·Edisiun d'a Spezza a l'arîva à pybricâ 'n articculu cuâ fôtu
de tytta-a famiggia spezinn-a e cuu sœxu za mêgu à l'Yspiâ Sant'Andrîa. U mesaggiu u l'êa
ciæu: datte da fâ o dunque nu stâ mancu à turnâ ...
Amiandu inderê int'a lunga stôia d'i açidenti, invexendi e dezastri à dannu d'u gluriûzu lœidu Felîçe Manin l'ôstàcculu ciy dŷu che u cúnsule u s'é truvòu lí depuî u l'é stætu u fætu d'aveighe da fâ cuu bacan d'u scâ de Blue Island, yn tippu che de ciy belinuin nu ghe n'é.
U J.R.B. u se prezenta cumme 'n trýgnu ch'u parla sûlu che l'american d'u Mississippi e ch'u zbraggia d'e pòule che nisciyn fuestê u pœ acapî. Tytte e votte ch'u l'incuntra d'e persunn-e nœve u l'atacca a fâ u cuntavésce cuu sœ pasòu à Memphis de guardia d'u corpu de Elvis Presley e, dapœ, d'u generâle Abrahams. Tytti discursci da fâ vegnî 'na testa ciy grossa che 'n balun. Cuu sœ travaggiu d'ancœ, tramêzu à tante demulisyin, (nun tytte cunfurme aa legalitæ...) u J.R. u l'é 'n persunaggiu de lungu ai bordi d'a lezze, cuu quæ saiéiva stætu mêgiu de nu aveighe tantu da fâ.
Ma træ côse cunplicâvan l'afâre:
1) a sœ grande arbaxîa d'êse stætu lê à sarvâ u lœidu da'na distrysiun segŷa;
2) e so preteize 'n fætu de palanche, ch'u nu vuéiva precizâ;
3) u fætu che u lœidu u ghe l'àiva lê e nu l'êa difiççile conclydde, int'a scituasiun, che l'ommu u l'êa l'ynnicu bun à stramiâlu fin ou portu d'inbarcu.
E alûa: cumme ariêscî à atruvâ a mainêa ciy prattica pe arivâ ou portu e, ou mæximu tenpu,
cumme tiâse fœa dai pê quell'ingunbrante sycun e falanpi ch'u nu vuéiva intende che sensa
'n'inbrâgatŷa d'âsâ, yn tiâ - ciamemmulu cumme vuêmu - yn scaffu de 25 tunêi,
lungu 22 mêtri (tyttu fœa) pe 5,60 u nu puéiva restâ stabbile 'nt'a stîva
d'u vapûre? L'é stætu cuscí che quellu belinun u n'ha fætu perde trei meixi cuê sœ prumisse
e cuê sœ micce.
L'âtra questiun a l'êa cumme ariêscî á fâ arivâ u scaffu scin ou portu atlanticu ciy vexin (Charleston; Nœva Iorche) dunde yn "porta-cuntenituî" d'a cunpagnîa MSC, a quarta d'u mundu inte questu canpu (prupriêtâ
A primma sulysiun: îsâlu insce'n batellu de quelli che culêgan Chicago à l'Atlanticu - emmu duvŷu scartâla: a saiéiva stæta troppu caa perché de linnie de navegasiun regulâre nu ghe n'é. E dapœ u San Luensu u l'é ciôsu pe sêi meixi l'annu, pe vîa d'a giassa.
A segunda sulysiun: îsâlu insce'n trênu scin à Norfolk - a nu l'êa puscibbile paa larghessa d'u scaffu, ch'u l'êa sensa precedenti 'nt'a stôia d'i stramŷi speciæ.
Nu gh'arestâva che 'na tersa sulysiun:
a) îsâlu insciuu remurcu de l'oututrênu de J.R. scin à Calumet, 'na caladda intanaa inte'n canâ ch'u l'intra 'nt'u sciymme Illinois e doppu int'u Mississippi;
b) descaregâlu in banchinn-a e 'nbrâgâ u scaffu inte'n tiâ d'âsâ che u cúnsule u l'àiva urdinòu insciuu postu;
c) îsâlu int'a stîva de'na ciatta, de quelle che stramŷan de tyttu, scin à Nœva Orleans. Difæti doppu che a cunpagnîa MSC a l'àiva açetòu de mandâ u vapûre fœa daa sœ rutta nurmâle pe cunclydde l'ôperasiun, u cúnsule u l'aiva pusciŷu negusiâ u nôu cuâ cunpagnîa d'e ciatte.
Pe fâ a primma parte vîa tæra Blue Island/caladda, (21 km de outustradda), a ciy areizegaa, emmu duvŷu aspêtâ u permissu speciâle d'u guvernatû de l'Illinois. Se semmu atruvæ cuu scaffu pôsòu insciuu remurcu, ligòu cun d'e çimme e tegnŷu à sequæu cun d'i tocchi de légnu e cun d'i pâfâ
Cuu lœidu turna 'nt'u nostru cuntrollu saiéiva stætu ciy faççile muntâ e asâdâ i
pâfâFætu u trazbordu, u vapûre d'a MSC u sarpâva da Nœva Orleans aa fin de marsu e u l'ormezâva aa Spezza ou 20 d'arvî d'u 2000, cuu scíndicu, l'amiralliu cumandante d'u darsenâ, a banda cumynâle e i discursci...
Pasòu âtri duî anni, u cumitâtu u tâxe, e nu se sà quande u Felîçe Manin u puriâ turnâ à navegâ.
Zunta finâ aa stôia:
Doppu tyttu stu tenpu, u J.R.B. u passa e sœ seiann-e inte'n'ôstaja d'u Calumet Port dunde u cuntinnua à cuntâ a stôia d'e sœ gren inpreize de sarvatû de l'italian ship. Pigiòu dou fymme de l'alcol u bacan d'u scâ de Blue Island u l'atacca de lungu à mugugnâ e a giastemâ che u sœ eroicu travaggiu u nu l'é stætu aprêxòu pe ninte dou guvernu italian.
E quande ghe cúntan sta stôia, ou cúnsule Granæa ghe piggia 'na gran futta...
22/12/2002